තම ඥාති පරම්පරාවෙන් ඈත් වන්නට සිදුවී, දේපළ ආදි හරිහම්බකරගත් සියල්ල අහිමිවී, දුක් සෝ සුසුම් මැද පීඩනයට ලක්ව සිටි වැඩිහිටි නිවාසවල වෙසෙන මව්, පියවරුන් සොයාගොස් ඔවුනගේ අධ්‍යාත්මය දහමින් පෝෂණය කර, ඔවුන්ගේ දැවුනු තැවුනු ආත්මය නිවාලන “ධම්ම පාරමී” සමාජ පෙරළියයි “පින්සාර සැන්දෑව” ලෙසින් හඳුන්වනුයේ. දෛවෝපගත කර්ම නිසාම වැඩිහිටි නිවසක තම ජීවිතයේ අවසන් කාලය ගතකිරීමට සිදුවුවත්, කිසිදු ආයාසයකින් තොරව නිදහසේ ජිවත් වෙමින් කල්‍යාණ මිත්‍ර උපකාරයෙන්, මැනවින් ශීලයක් ආරක්ෂා කරමින්, හෙට දිනයේ සුගතියක් පිළිඹඳ නියත විශ්වාසයක් ඇතිකර ගැනීමට හැකිවන භූමියකි.
වැඩිහිටි නිවාස එවන් ක්ෂේම භුමි බවට පත් කිරීම සඳහාම ධම්ම පාරමී අප විසින් දිවයින පුරා පවත්වාගෙන යනු ලබන එක් වැඩිහිටි නිවාසයකට මසකට වරක් හෝ දෙවරක් මහා සංඝරත්නය වැඩම කරවමින් එහි වෙසෙන දෙමාපියන් ධර්මයෙන් පෝෂණය කරවීම සිදුකරනු ලබයි.
මෙසේ දිනෙන් දින ධර්මයෙන් පෝෂණය වන පින්වත් මව් පියවරුන් හට තව තවත් තමන්ගේ භාවනාව තියුණු කර ගැනීමට හැකි වන පරිදි, භාවනා කමටහන් ලබාගැනීමේ පහසුකම් සළසමින් කම්මට්ඨානාචාර්‍ය ස්වාමින් වහන්සේලා වැඩමකරවමින් වැඩිහිටි නිවස සඳහා කමටහන් ලබා ගැනීමට ඉඩ හසර සළසා දීම.
