ධම්ම පාරමී පදනමේ හිමිකාරත්වය දරන්නට කිසිදු අයිතිකාරයෙක් නොමැති වීම, ඒ වගේම සභාපති, ලේකම් හෝ භාණ්ඩාගාරික වැනි ගරු තනතුරු, “ධම්ම පාරමී” සංවිධානයට අයත් නොවීමම, එහි පළමු සුවිශේෂී ලක්‍ෂණයි. කරුණු එසේ නම් නිසි නායකත්වයක් ලැබෙන්නේ කෙසේද ? ධම්ම පාරමී පදනමෙහි සියලූම සාමාජිකයින් සම දායක දායිකාවන් වන අතර, පත්වන්නා වූ “අනුශාසක දායක මණ්ඩලය” මගින් වරින්වර, එක් එක් සම දායක දායිකාවන්හට රාජකාරීන් පැවරීම සිදු කරනු ලැබේ.

“ධම්ම පාරමී” සංවිධානය පවත්වාගෙන යනු ලබන්නේ, දහඩිය මහන්සියෙන් සාධාරණ ලෙස උපයා ගත්, පිරිසිඳු මුදලින් ගොඩනගාගත් අරමුදලකින් වන අතර, ඒ සඳහා දේශීය හෝ විදේශීය කිසිඳු බාහිර පාර්ශවයකින් කිසිඳු මුදලක් හෝ කිසිඳු අමුද්‍රව්‍යයක් භාර ගැනීමට “ධම්ම පාරමී” සංවිධානයේ ව්‍යවස්ථාවට අනුව කිසිඳු අවසරයක් නොමැත.

“ධම්ම පාරමී” සංවිධානය මේ ධනය, ශ්‍රමය කාලය වැයකරන්නේ ඔවුනගේ නෑයන් හෝ මිතුරන් හෝ දන්නා අය වෙනුවෙන් නොව, ජිවිතේ කිසිදු දවසක හමුවී නොමැති, ඔවුන් හා කිසිම සම්බන්ධයක් නොමැති අසරණයින් වෙනුවෙන් සඳහාම වීම මෙහිදී සුවිශේෂයි. එසේම, සත්‍ය වශයෙන්ම උපකාරයක් අවශ්‍ය කාහටද, එම පුද්ගලයා එම සමාජ කොට්ඨාශය අදාළ උපකාරය යදින්නට ප්‍රථම, ඔවුන්ගේ දෙපා අභියසටම ගොස් එම උපකාරය ඒ ශක්තිය ලබාදීම, “ධම්ම පාරමී” සංවිධානයනයෙහි ප්‍රධාන අභිප්‍රාය වේ.

මෙසේ නිහඩ, ලක්‍ෂ සංඛ්‍යාත අසරණ ජනී ජනයා හට අධ්‍යාත්මික සැනසුම ලබාදීමට “ධම්ම පාරමී” පදනම සමත් වුවද, ඒ ලබාදුන් සතුට සැනසුම සදාකාලිකද? නොමැත. “ධම්ම පාරමී” පදනම මේ හැම ක්‍රියාකාරකමක්ම අනිත්‍ය බව තේරුම් ගෙන තිබෙන අතරම, මේ අනිත්‍ය භාවය මැනවින් ලෝකයා ඉදිරියට රැගෙන එන්නේ බුදු දහම බවත් තේරුම් ගෙන අවසානය. එබැවින්, බුදු දහමේ අධ්‍යාත්මය මැනවින් සමාජගත කිරීමේ කර්තව්‍ය සඳහාම “ධම්ම පාරමී” නමින් ඒ මහා යෝධ සංවිධානය 2016 ජනවාරි මස 19 වන දින සුභ මොහොතින් ආරම්භ කරනු ලැබූහ.